Arnar hættur með Fjölni

Arnar Gunnarsson er hættur sem þjálfari karlaliðs Fjölnis í handbolta.

Arnar skilur við Fjölni í 10. sæti Olís-deildarinnar. Fjölnismenn eiga enn eftir að vinna leik á tímabilinu en hafa gert tvö jafntefli.

Arnar var hársbreidd frá því að koma Fjölni upp í Olís-deildina 2015 og 2016 en bæði árin tapaði liðið í oddaleik um sæti í efstu deild.

Í fyrra unnu Fjölnismenn 1. deildina með yfirburðum og tryggðu sér þar með sæti í Olís-deildinni.

Næsti leikur Fjölnis er gegn FH eftir viku.