Nýr Nissan Leaf grimmselst

Nissan menn geta tæplega kvartað yfir móttökunum á nýrri kynslóð rafmagnsbílsins Leaf, en á fyrstu tveimur mánuðunum frá því að opnað var fyrir pantanir á bílnum hafa verið pöntuð 9.000 eintök. Í Evrópu hafa pantanir náð 3.500 bílum, en til samanburðar tók það heilt ár á fá svo margar pantanir í fyrstu kynslóð Nissan Leaf.

Merkilegt má teljast að af þessum 3.500 bílum eru 2.000 þeirra í Noregi, en þar í landi var fyrst opnað fyrir pantanir og höfðu því Norðmenn nokkuð forskot á aðrar þjóðir. Þetta gerðu þeir Nissan menn vegna þess að í Noregi hefur sala Leaf verið frábær frá upphafi og fyrir það vildi Nissan verðlauna Norðmenn.

Fyrstu Leaf bílarnir sem Nissan mun afgreiða af þessari nýju kynslóð eru svokallaðir “launch edition”-bílar og kallast 2.Zero. Eru þeir einstaklega vel búnir og því nokkuð dýrir. Verð þeirra er 31.950 evrur, eða 3,9 milljónir króna. Ódýrari gerðir bílsins koma svo út úr verksmiðjum Nissan í kjölfarið. Nýr Leaf er með 40 kWh rafhlöður sem duga til 250 km aksturs og fljótlega mun Nissan einnig bjóða 60 kWh rafhlöður í þessa nýju kynslóð og kemst hann þá 360 km á fullri hleðslu.