Blikastelpur skoruðu átta síðustu stigin og slógu Haukaliðið út úr bikarnum

Blikar eru komnar í átta liða úrslit Maltbikars kvenna í körfubolta eftir fjögurra stiga sigur á Haukum, 70-66, í Smáranum í dag.

Nýliðar Blika unnu sannfærandi sigur í deildarleik liðanna á dögunum og það breyttist ekki í dag en það var samt miklu meiri spenna í þessum leik en í þeim fyrir ellefu dögum.

Í raun stefndi í það að Haukarnir ætluðu að hefna fyrir tapið í deildinni en frábær endakafli tryggði Blikum sigurinn.  

Haukakonur voru fjórum stigum yfir, 66-62, þegar tvær og hálf mínúta var eftir en Blikaliðið skoraði átta síðustu stig leiksins og tryggði sér sigurinn.

Ivory Crawford skoraði 21 stig og tók 11 fráköst fyrir Blikaliðið í leiknum en Isabella Ósk Sigurðardóttir var með 12 stig og 10 fráköst og Telma Lind Ásgeirsdóttir skoraði 10 stig þar á meðal rosalega mikilvæga þriggja stiga körfu á lokakaflanum.

Helena Sverrisdóttir var langatkvæðamest í Haukaliðinu með 22 stig, 17 fráköst og 5 stoðsendingar en Cherise Michelle Daniel skoraði 14 stig.