Arnar: Aðrir en ég sem verða að leysa þetta mál

„Mér fannst lokastaðan aðeins of stór, en þetta er langbesta lið deildarinnar. Margt sem við reyndum gekk upp, en þeir eru með bestu vörnina, eru rútíneraðir og vel þjálfaðir svo við vissum að þetta yrði krefjandi,” sagði Arnar Gunnarsson, þjálfari Fjölnis, eftir tólfa marka tap gegn FH í Olís-deild karla í kvöld.

„Við erum líka að gera okkur seka um ansi klaufaleg mistök og það kostar bara mörk í bakið. Þeir eru bara það góðir, en kannski hefði ég átt að rúlla liðinu aðeins meira.”

„Mér fannst menn vera þokkalega ferskir, en við fórum í verri skot og nýttum okkar verr. Það er munur á deildum; FH refsar á meðan liðin í neðri deildunum gera það ekki.”

„Við erum á réttri leið og bætum okkar leik reglulega. Við þurfum bara fara hala inn fleiri stigum. Ég er fullviss um að það takist.”

Mikið hefur gengið á í Grafarvoginum undanfarnar vikur. Arnar var rekinn af formanni handknattleiksdeildar, en ekki stjórninni og að endingu stóð hann enn sem þjálfari. Hvernig horfði þetta við Arnari?

„Eins og gefur að skilja var þetta ekki skemmtilegt. Ég átti góðan fund í gærkvöldi með formanni aðalstjórnar og sá fundur var mjög góður. Það eru aðrir en ég sem verða að leysa þetta mál,” en hefur þetta bíó ekki einhver áhrif á leikmenn liðsins?

„Jú, einhver, en mér fannst við nýta þetta til góðs. Það er góð samheldni í þessu liði og við erum flott liðsheild. Ég hefði ekki áhyggjur að það myndi brotna. Mér fannst menn nýta þetta frekar í góðar æfingar og þessi leikur ekki alslæmur.”

Hefur Arnar rætt við formanninn eftir að þetta gerðist? „Já, stuttlega,” og gekk það vel? „Ég ætla ekki að fara út í það,” sagði Arnar að lokum.