Guðjón Rúnarsson til Atlantik Legal Services

Guðjón Rúnarsson, fyrrverandi framkvæmdastjóri Samtaka fjármálafyrirtækja (SFF), hefur tekið til starfa hjá lögmannsstofunni Atlantik Legal Services.

Guðjón, sem er lögfræðingur að mennt, var framkvæmdastjóri SFF og forvera þeirra allt frá árinu 2000 en lét þar af störfum í september í fyrra. Hann var skipaður formaður fimm manna nefndar síðastliðið sumar sem hafði það hlutverk að fara yfir niðurstöður starfshóps um aðskilnað viðskiptabanka- og fjárfestingarbankastarfsemi. Átti nefndin að taka afstöðu til þess hvort ástæða væri til að gera breytingar á núverandi skipan mála og skila tillögum til fjármála- og efnahagsráðherra.

Lögmannsstofan Atlantik hagnaðist um tæplega 33 milljónir á árinu 2016 og námu tekjur félagsins samtals 194 milljónum. Á meðal starfsmanna stofunnar eru lögmennirnir Benedikt Einarsson, Eiríkur Elís Þorláksson og Bogi Guðmundsson.

Fréttin birtist fyrst í Markaðnum, fylgiriti Fréttablaðsins um viðskipti og fjármál.