Ísland og Færeyjar deila um kolmunna

Samningaviðræður Íslands og Færeyja um gagnkvæmar fiskveiðar innan efnahagslögsögu landanna hafa siglt í strand að hluta. Fundað verður um málið í atvinnuveganefnd þingsins í dag.

Utanríkisráðherra hefur lagt fram þingályktunartillögu sem heimilar ríkisstjórninni að staðfesta samninga um veiðarnar, sem náðust í júlí, fyrir Íslands hönd. Heimildin er bundin þeim fyrirvara að íslenskum skipum verði jafnframt heimilt að veiða kolmunna og norsk-íslenska síld innan lögsögu Færeyja á komandi ári.

Deilan nú snýst meðal annars um að Færeyingar vilja fá auknar veiðiheimildir í botnfiski, þar með talið þorski, í lögsögu Íslands. Náist samkomulag ekki munu íslensk skip ekki geta veitt kolmunna og norsk-íslenska síld í færeyskri lögsögu. Tæp 90 prósent kolmunnaafla Íslands er veiddur þar.

„Við fáum kynningu frá trúnaðarfulltrúum utanríkis- og sjávarútvegsráðuneytisins. Það er vonandi að þessi ágreiningur leysist sem fyrst,“ segir Lilja Rafney Magnúsdóttir, formaður atvinnuveganefndar.