Geir: Vonlaust að reyna að verja forskot

Lansliðsþjálfari Íslands, Geir Sveinsson, var ekki sáttur með hvernig fór þegar Ísland tapaði gegn Serbíu í lokaleik sínum í riðlakeppni EM í handbolta eftir að hafa verið fjórum mörkum yfir í seinni hálfleik.

„Ef við tökum fyrri hálfleikinn fyrir fyrst þá er alveg klárt að okkur fanst öllum eins og við ættum inni,“ sagði Geir í viðtali við Henry Birgi Gunnarsson sem er staddur í Split.

„Það vantaði svolítið þessa árásargirni sem við höfðum í hinum leikjunum, allavega gegn Svíum og fyrri hálfleik gegn Króötum. Svo þegar um 20 mínútur voru eftir þá er svolítið eins og við förum að verja hlutina, ekki ósvipað og það sem gerðist á móti Svíum, og þetta er eitthvað sem við þurfum að skoða, ég held við töpum síðustu 20 mínútunum með einhverjum 6-7 mörkum.“

Fer liðið einfaldlega á taugum, þegar þeir eru komnir í góða stöðu sem þarf að halda út?

„Það getur bara mjög vel verið, það er einn faktor. Þegar menn fara að verja forskotið, það er bara vonlaust. Allan leikinn vorum við í jafnvægi og leið þægilega, en þá áttum við samt eitthvað inni. Svo dettur þetta enn frekar til baka og var orðið ansi slapt.“

Þegar sjö sekúndur voru eftir af leiknum voru Serbar með boltann í sókn, þremur mörkum yfir, og mark frá þeim hefði sent okkur heim. Björgvin Páll Gústavsson varði síðasta skot Serbanna og Ísland á enn möguleika á að fara áfram.

„Við getum velt okkur upp úr því, ef við hefðum nýtt einu færinu meira hefði það verið í lagi. Þetta er niðurstaðan og við tökum henni eins og hún er.“

„Það er ekki hægt að drepa leikinn, þeir myndu aldrei gefast upp og aldrei hætta, þeirra frammistaða hingað til hefur sínt það. Ég er svekktur með það að við náum ekki að halda dampi,“ sagði Geir Sveinsson.