Brotist inn í dýraspítalann í Víðidal

Áfram heldur innbrotafaraldurinn á höfuðborgarsvæðinu sem reglulega hefur verið fjallað um á síðustu vikum.

Brotist var inn á tveimur stöðum í Reykjavík í nótt, annars vegar var farið inn í fyrirtæki í Súðarvogi og hins vegar var brotist inn í dýraspítalann í Víðidal.

Lítið er vitað um málin að svo stöddu. Ekki er búið að taka saman hverju var stolið eða gera úttekt á skemmdum. Þó greinir lögreglan frá því að það hafi verið „farið inn og rótað“ í Víðidal.

Sjá einnig: Gruna að glæpasamtök stundi innbrot á höfuðborgarsvæðinu

Af öðrum málum sem komu inn á borð lögreglunnar í nótt ber helst að nefna líkamsárás við veitingahús í Kópavogi á sjötta tímanum í gærkvöldi. Þar var einn maður handtekinn grunaður um að hafa veist að öðrum. Hinn grunaði hefur fengið að verja nóttinni í fangaklefa en ekki er vitað hvernig þolandanum heilsast.

Að sama skapi voru nokkrir ökumenn stöðvaðir sem grunaðir eru um að hafa ekið undir áhrifum vímuefna.