Haukar endurheimtu toppsætið

Haukar unnu Breiðablik nokkuð örugglega í Smáranum í dag í Domino's deild kvenna í dag.

Gestirnir náðu að koma sér upp sjö stiga forskoti undir lok fyrsta leikhluta sem Blikar náðu að vinna til baka í öðrum leikhluta bara til þess að tapa því niður aftur fyrir leikhléið. Staðan var 31-37 fyrir gestina þegar liðin gengu til búningsherbergja.

Krafturinn sem var í heimakonum í fyrri hálfleik virtist fjara út í leikhléinu því Haukakonur sigldu hægt og rólega lengra og lengra fram úr í seinni hálfleik. Staðan fyrir síðasta fjórðunginn var 55-39 og lokatölur urðu 74-57.

Haukar hafa nú unnið síðustu átta deildarleiki sína í röð og sitja á toppi deildarinnar með 28 stig eins og Valskonur. Blikar eru í 7. sæti með 16 stig líkt og Snæfell og Skallagrímur í sætunum fyrir ofan. Sex stig eru í fjórða sætið, síðasta sætið í úrslitakeppninni.

Helena Sverrisdóttir var enn og aftur framúrskarandi í liði Hauka, með 17 stig, 14 fráköst og 9 stoðsendingar ásamt því að fiska 6 villur.

Breiðablik-Haukar 57-74 (10-17, 21-20, 8-18, 18-19)

Breiðablik: Sóllilja Bjarnadóttir 17, Auður Íris Ólafsdóttir 13/5 fráköst, Whitney Kiera Knight 12/10 fráköst/5 stolnir/3 varin skot, Telma Lind Ásgeirsdóttir 9, Isabella Ósk Sigurðardóttir 6/4 varin skot, Birgit Ósk Snorradóttir 0, Melkorka Sól Péturdóttir 0, Eyrún Ósk Alfreðsdóttir 0, Lovísa Falsdóttir 0, Arndís Þóra Þórisdóttir 0, Kristín Rós Sigurðardóttir 0, Hafrún Erna Haraldsdóttir 0.

Haukar: Þóra Kristín Jónsdóttir 19/7 fráköst/5 stolnir, Helena Sverrisdóttir 17/14 fráköst/9 stoðsendingar, Whitney Michelle Frazier 14/11 fráköst/10 stoðsendingar, Dýrfinna Arnardóttir 6, Fanney Ragnarsdóttir 5, Ragnheiður Björk Einarsdóttir 5, Rósa Björk Pétursdóttir 4, Anna Lóa Óskarsdóttir 3, Þórdís Jóna Kristjánsdóttir 1, Magdalena Gísladóttir 0, Stefanía Ósk Ólafsdóttir 0, Sigrún Björg Ólafsdóttir 0.