Fyrirtæki tengdasonar Trump fengu stór lán eftir fundi í Hvíta húsinu

Jared Kushner, tengdasonur Donalds Trump Bandaríkjaforseta og einn helsti ráðgjafi hans, fundaði með forsvarsmönnum tveggja fjármálastofnana í Hvíta húsinu snemma árs í fyrra og skömmu síðar veittu sömu stofnanir fyrirtækjum Kushner stór lán.

Hagsmunatengsl Kushner hafa orðið honum fjötur um fót að undanförnu. Öryggisheimild sem veitti honum aðgang að ríkisleyndarmálum var lækkuð fyrir helgi en alríkislögreglan FBI hafði ekki viljað staðfesta umsókn hans um heimildina vegna áhyggna af samskiptum hans við fulltrúa erlendra ríkja.

Washington Post sagði frá því í vikunni að embættismenn að minnsta kosti fjögurra ríkja hefðu rætt um hvernig þeir gætu nýtt sér viðskiptahagsmuni Kushner, skuldir og reynsluleysi til að hafa áhrif á stefnu Bandaríkjastjórnar.

Embættismenn Hvíta hússins hafi haft áhyggjur af því að  Kushner væri „barnalegur og verið væri að leika á hann“ í viðræðum við erlenda erindreka. Í sumum tilfellum vildu þeir aðeins ræða við Kushner beint frekar en reyndari bandaríska embættismenn.

Lán upp á sjötta hundrað milljóna dollara

Nú segir New York Times frá fundum sem Kushner átti með forsvarsmönnum tveggja stórra fjármálastofnana í Hvíta húsinu í fyrra rétt áður en þær veittu fyrirtækjum hans umtalsverð lán.



Annar þeirra var Joshua Harris, stofnandi fjárfestingafélagsins Apollo Global Management, en hann veitti Hvíta húsinu ráðgjöf um innviðastefnu. Hitti hann Kushner á fjölda funda snemma í fyrra og kom meðal annars til tals að Harris yrði ráðinn til starfa í Hvíta húsinu.

Ekkert varð af þeirri ráðningu en í nóvember lánaði Apollo fasteignafyrirtæki fjölskyldu Kushner 184 milljónir dollara til að endurfjármagna veð í skýjakljúfi í Chicago. Lánið var þrefalt stærra en hefðbundin fasteignalán félagsins og var eitt það stærsta sem fyrirtæki Kushner fékk í fyrra.

Talsmaður Apollo segir að Harris hafi ekki komið nálægt lánveitingunni sem hafi farið í gegnum hefðbundið ferli hjá félaginu.

Þá fékk fyrirtæki Kushner-fjölskyldunnar og samstarfsfyrirtæki þess 325 milljón dollara lán frá Citigroup-bankanum til að fjármagna skrifstofubyggingar í Brooklyn í New York. Það lán var veitt síðasta vor eftir að Kushner hafði fundað með Michael L. Corbat, forstjóra Citigroup, í Hvíta húsinu.

Talskona Citigroup segir að samið hafi verið um lánið við samstarfsaðila fyrirtækis Kushner. Staða hans í Hvíta húsinu hafi ekki áhrif á viðskiptasamband hans við bankann.

Hagsmunaárekstrar á hagsmunaárekstra ofan

Lögmaður Kushner neitar því ekki að fundirnir hafi átt sér stað. Kushner hafi hins vegar hitt hundruð athafnamanna og að hann taki engan þátt í viðskiptum, lánum eða verkefnum fjölskyldufyrirtækjanna eftir að hann hóf störf í Hvíta húsinu.

Þrátt fyrir að hafa stigið til hliðar sem forstjóri fjölskyldufyrirtækisins og selt lítinn hluta af eignarhlut sínum til sjóðs sem móðir hans stýrir heldur Kushner enn stórum eignarhlut í fjölskyldufyrirtækjunum, að sögn New York Times. Þar á meðal á hann enn hlut í fyrirtækinu sem fékk lánið frá Citigroup.

Þetta hefur vakið upp áleitnar spurningar um mögulega hagsmunaárekstra Kushner. Robert Mueller, sérstakur rannsakandi dómsmálaráðuneytisins á afskiptum Rússa af forsetakosningunum árið 2016, er meðal annars sagður grennslast fyrir samskipti Kushner við erlenda fjárfesta.

Trump hefur falið Kushner fjölda starfa fyrir ríkisstjórn sína, þar á meðal að móta stefnu gagnvart Miðausturlöndum. Á sama tíma á fyrirtæki fjölskyldu Kushner enn í viðskiptum við fjárfesta í Ísrael.

New York Times bendir á að athafnamennirnir sem Kushner fundaði með eigi mikið undir ákvörðunum ríkisstjórnar Trump. Þannig reyni Apollo að hagnast á boðaðri innviðauppbyggingu og Citigroup hefur reynt að fá stjórnvöld til að slaka á reglum um fjármálakerfið.

Eins áttu þeir og fyrirtæki þeirra mikilla hagsmuna að gæta í meiriháttar skattkerfisbreytingum sem repúblikanar samþykktu í desember. Skömmu eftir lánveitinguna til fyrirtækis Kushner græddi Apollo verulega á skattalækkununum, ekki síst eftir að Trump féll frá hugmynd sinni um að loka smugu í skattalöggjöfinni sem hefði þýtt að stjórnendur fjárfestingarfélaga þyrftu að greiða tvöfalt hærri skatt af tekjum sínum.