Búast við snjókomu víða um landið á páskadag

Úrkomusamt verður á Suðaustur- og Austurlandi í dag en þurrt annars staðar. Hægur vindur verður um allt land og hiti víðast hvar yfir frostmarki. Þetta kemur fram í hugleiðingum veðurfræðings Veðurstofunnar.

Þar kemur einnig fram að áfram verði hægur vindur fram yfir morgundag en annað kvöld megi búast við einhverri úrkomu og norðaustanátt. Á laugardag er útlit fyrir norðaustlæga átt með minniháttar éljum norðantil en úrkomubakki færist suður af landinu um kvöldið.

Á páskadag má búast við kólnandi veðri og örlítilli snjókomu í öllum landshlutum. 

Veðurhorfur á landinu

Spáð er rigningu eða slyddu á austanverðu landinu og 3-10 m/s austlægri átt en þurrt vestan til. Úrkomuminna verður á landinu seinni partinn í dag og hiti á bilinu 1-9 stig. Mildast verður veðrið á Suðvesturlandi.  

Reikna má með dálítilli úrkomu á morgun víða á landinu og svalara veðri.

Veðurhorfur á landinu næstu daga

Á laugardag:

Austlæg átt, 8-13 m/s og víða skúrir eða él, en úrkomulítið NV-lands. Hiti að 5 stigum S-til, en annars vægt frost. 

Á sunnudag (páskadagur):

Austlæg eða breytileg átt, 3-8 m/s og él eða dálítil snjókoma í öllum landshlutum. Kólnandi veður. 

Á mánudag (annar í páskum), þriðjudag og miðvikudag:

Útlit fyrir norðaustanátt með éljagangi og svölu veðri, en yfirleitt bjartviðri V-lands.

Færð og aðstæður

Vegir eru víðast hvar auðir á Suðurlandi samkvæmt upplýsingum frá Vegagerðinni. Þó eru hálkublettir í Þrengslum, á Sandsskeiði, Hellisheiði, Mosfellsheiði og á nokkrum vegum í uppsveitum. Vegir eru greiðfærir á Vesturlandi - og eins á láglendi á  Vestfjörðum en þar er vetrarfærð á fjallvegum. Dynjandisheiði er lokuð.

Á Norðurlandi er víðast greiðfært en hálka er á Öxnadalsheiði. Það er hálka á Norðaustur- og Austurlandi, einnig er þoka á Vopnafjarðarheiði. Snjóþekja og skafreningur er á Fjarðarheiði. Krapi og éljagangur er á Fagradal og frá Reyðarfirði að Breiðdalsvík. Breiðdalsheiði og Öxi eru ófærar. 

Auður vegur er með suðausturströndinni en hálkublettir eru þó á Mýrdalssandi.