Heimasímar víkja fyrir gagnamagni

Notendum heimasíma fækkaði lítillega milli áranna 2016 og 2017 en hringdum mínútum úr slíkum símum fækkaði aftur á móti mikið. Þetta er meðal þess sem lesa má úr tölfræðiskýrslu Póst- og fjarskiptastofnunar um íslenskan fjarskiptamarkað fyrir árið 2017.

Farsímaáskriftir jukust samhliða fólksfjölgun. Fjölgun varð í samningsbundnum áskriftum en fyrirframgreidd símkort voru færri í fyrra en árið 2016. Gagnamagn á farsímaneti hélt áfram að aukast þó lítillega hafi dregið úr aukningunni. Rúmlega fjörutíu prósent nettenginga á landinu eru í gegnum ljósleiðara.

Velta fjarskiptafyrirtækja jókst lítillega í fyrra. Tekjur vegna heimasíma og farsíma drógust saman en á móti jukust tekjur af fastaneti, gagnaflutningum og internet- og sjónvarpsþjónustu.