Þyrlur Gæslunnar í þrjú útköll í dag

Þyrlur Landhelgisgæslunnar hafa verið kallaðar út þrívegis það sem af er degi vegna veikinda eða slysa. Á tólfta tímanum var óskað eftir aðstoð vegna veikinda í Ólafsvík og hélt TF-SYN á staðinn og sótti sjúklinginn. Lenti þyrlan við Landspítalann í Fossvogi skömmu fyrir klukkan eitt.

Þá óskaði Neyðarlínan eftir þyrlu Landhelgisgæslunnar klukkan hálf þrjú vegna konu sem hafði slasast í Reynisfjör. TF-GNÁ var send á staðinn og sótti konuna við Skógafoss. Er þyrlan tók á loft þaðan barst önnur beiðni frá Neyðarlínunni, nú vegna umferðarslyss við Úlfljótsvatn. Aftur var óskað eftir aðstoð þyrlu Gæslunnar.

Ákveðið var að TF-GNÁ skyldi halda í átt að Úlfljótsvatni en TF-SYN var sömuleiðis kölluð út með hæsta forgangi og send á staðinn.

„Konan um borð í TF-GNÁ var lærbrotin og var ákveðið að hún færi með TF-SYN frá Úlfljótsvatni áleiðis á Landspítalann.  Læknirinn um borð í TF-GNÁ gat því hugað að þeim sem lentu í bílslysinu á Úlfljótsvatni en þyrlan tók á loft þaðan með tvo slasaða klukkan 16:35 og lenti laust fyrir klukkan 17:00 við Landspítalann í Fossvogi,“ segir í tilkynningu frá Landhelgisgæslunni.