Hefur klippt 143 þúsund kolla á 50 árum á Selfossi

Björn Gíslason, rakari á Selfossi, fagnar fimmtíu ára afmæli í dag sem rakari, auk þess sem rakarastofan sem pabbi hans stofnaði, Gísli Sigurðsson, rakarameistari fagnar 70 ára afmæli. Björn hefur klippt 143 þúsund kolla á þessum fimmtíu árum.

Það er alltaf nóg að gera á rakarastofu Björns og Kjartans í Miðgarði á Selfossi en þar vinnur líka Björn Daði, sonur Björns og bróðir Kjartans. 

Guðrún Þórhallsdóttir og  Mohammad Alibo frá Sýrlandi vinna líka á stofunni en Mohammad flutti sem flóttamaður á Selfoss fyrir 10 mánuðum. Í dag var 70 ára afmæli rakarastofunnar fagnað og 50 ára rakaraafmæli Björns. Kjartan hefur starfaði sem rakari í 34 ár, hann segir starfið mjög skemmtilegt.

„Það er bara samskiptin við fólk og að tileinka sér jákvætt viðhorf og vera glaðsinna, það gefur hverju degi gildi, ég horfi á það þannig. Við fáum auðvitað menn stundum sem eru aðeins langt niðri út af einhverjum aðstæðum í þeirra lífi, þá bara reynum við að porra þá upp og svo er aðrir sem koma hingað glaðskellandi og í miklu fjöri, þá reynum við að taka þátt í því“, segir Kjartan.

Viðskiptavinir stofunnar koma allsstaðar frá Suðurlandi, karlar, konur, börn og unglingar.

„Ætli ég komi ekki ekki svona 10 sinnum á ári, ég kom fyrst til Gísla fimm ára á Kirkjuveginn og sat þá á fjöl. Það er alltaf gaman að koma hingað þó ég sé kannski alltaf sammála þeim í pólitíkinni en það er alltaf eitthvað að ræða“, segir Sigurdór Karlsson, íbúi á Selfossi.

Já, talandi um pólitík, feðgarnir eru miklir sjálfstæðismenn enda situr Kjartan í bæjarstjórn Árborgar fyrir Sjálfstæðisflokkinn og pabbi hans sat þar líka í mörg ár.

„Við klippum allra flokka kvikindi eins og sagt er, það er engin skilyrði í þessu, það er bera ferskur vindur sem blæs hér úr öllum áttum“, segir Björn.