Can biðst afsökunar á að hafa gert lítið úr konum

Emre Can, leikmaður Juventus, fékk heldur betur að heyra það eftir umdeild ummæli sem hann lét falla eftir Meistaradeildarleik Juve í vikunni.

Liðsfélagi Can, Cristiano Ronaldo, var rekinn af velli í leiknum fyrir að toga í hárið á andstæðingi og Can var reiður yfir því.

„Við erum ekki konur. Við erum að reyna að spila fótbolta,“ sagði Can sem fékk í kjölfarið gusurnar úr öllum áttum þar sem hann var kallaður karlremba.

Hann hefur nú beðist afsökunar á óheppilegu orðavali.

„Allir sem þekkja mig vita hvað ég ber mikla virðingu fyrir konum. Ég ætlaði ekki vísvitandi að gera lítið úr konum eða jafnrétti á nokkurn hátt,“ sagði þýski landsliðsmaðurinn sem kom til Juve frá Liverpool í sumar.

„Ég var að reyna að verja liðsfélaga minn því mér fannst ekki rétt að reka hann af velli. Ég biðst innilega afsökunar ef orð mín hafa sært einhvern.“