Toyota innkallar tvo bíla

Toyota á Íslandi þarf að innkalla tvær Toyota Avensis bifreiðar af árgerðinni 2006. Á vef Neytendastofu segir að ástæða innköllunarinnar sé að möguleiki er á að hliðarloftpúðar í framsætum virki ekki sem skyldi. Hliðarpúðar í framsætum eiga að blása út við ákeyrslu á hlið bílsins.

Eigendum bílanna verður tilkynnt um innköllunina bréfleiðis og er viðgerðin sögð eigendunum að kostnaðarlausu. Hún felst í því að umræddum öryggispúðum verður skipt út fyrir nýja og ætti að taka um eina til tvær klukkustundir.

„Neytendastofa hvetur bifreiðaeigendur til að fylgjast vel með hvort að verið sé að innkalla þeirra bifreiðar og hafa samband við umboðið ef þeir eru í vafa,“ segir á vef Neytendastofu.