Bílstjórar hjá Strætó lögðu niður vinnu til að mótmæla ótryggðum ökutækjum

Strætó tók þrjá bíla sem notaðir voru við ferðaþjónustu fatlaðra úr umferð eftir að bílarnir reyndust ótryggðir. Bílarnir voru frá ferðaþjónustufyrirtækinu Prime Tours, en gjaldþrotabeiðni var tekin fyrir fyrr í þessum mánuði vegna vangreiddra gjalda fyrirtækisins og var skiptastjóri skipaður á miðvikudag.

Upplýsingafulltrúi Strætó, segir að þetta sé ekki í fyrsta sinn sem komið hafa upp vandamál vegna viðskipta þeirra við Prime Tours. Hann segir fyrirtækið bíða frekari frétta af málum fyrirtækisins í dag.

Um fjórtán verktakar sem starfa við akstursþjónustu fatlaðra lögðu niður störf klukkan ellefu í dag. Vilja þeir með því mótmæla sinnuleysi Strætó í málinu og íhuga að fara fram á lögbann á það að PrimeTours starfi áfram þó félagið hafi verið tekið til gjaldþrotaskipta.

Sigurður Stefánsson, einyrki og verktaki sem starfað hefur við akstursþjónustu fatlaðra frá árinu 1981, er einn þeirra verktaka sem lögðu niður störf í dag. Tvisvar áður hefur hópur verktaka sem starfar við akstursþjónustu fatlaðra kært Strætó til kærunefndar útboðsmála vegna Prime Tours og unnið bæði málin, samkvæmt Sigurði.

„Þetta Prime Tours var tekið til gjaldþrotaskipta og seinna náðu þeir nauðasamningum við ríkið og lífeyrissjóði og svo var það tekið til gjaldþrotaskipta þriðja október og skiptastjóri skipaður í gær eða fyrradag. Svo komumst við að því í gær að það væru ótryggðir bílar sem þeir væru með fjórir og þrír í gangi. Við létum vita af þessu í strætó í gær svo í morgun þegar við vorum að vinna og mætum á vinnustað fatlaðra í Ögurhvarfi þá sé ég að kemur einn bíllinn með farþega og það er einn af þessum ótryggðu,“ segir Sigurður í samtali við Vísi.

„Við gerðum athugasemdir við Strætó og þá voru þeir kallaðir inn. Þá ákváðum við, eftir að Prime Tours sendu út tilkynningu að þeir ætluðu að byrja aftur klukkan ellefu, að mótmæla því að þeir væru að vinna enn þá undir stjórn skiptastjóra með því að leggja niður vinnu klukkan ellefu og það sem eftir lifir dagsins. Sérstaklega þar sem það er rólegt, það er skólafrí, þetta bitnar eins lítið á skjólstæðingum okkar eins og hægt er.“

Guðmundur Heiðar Helgason, upplýsingafulltrúi Strætó segir að allt kapp sé lagt á að verkfall verktakanna hafi ekki áhrif á akstur dagsins og tekur undir með Sigurði um að skólafrí hjálpi til. Hann segir Strætó fylgjast vel með stöðu mála hjá Prime Tours í dag en að mikil óvissa ríki um málið að svo stöddu.

Sigurður hefur, eins og fyrr segir, starfað við akstursþjónustu fatlaðra frá 9. áratug síðustu aldar og hefur unnið ýmist sem fastur starfsmaður eða verktaki. Hann er ekki ánægður með hvernig Strætó hefur staðið að starfseminni síðustu ár.

„Við verktakarnir erum allir búnir að vera í þessu frá því þetta byrjaði að snúast meira og minna og við erum allir jafn óánægðir og svekktir með þetta kerfi. Ekki síst hvernig þetta kerfi hefur bitnað á farþegunum því aldrei nokkurn tíma hefur verið jafn öflug þjónusta, eins margir bílar og eins mikið af fólki. Eins öflugt fyrirtæki og strætó og allt þetta en það er ekkert að fúnkera.“