Gefur Stróki á Suðurlandi sína hæstu einkunn

Um tuttugu manns nýta sér daglega þjónustu Klúbbsins Stróks á Suðurlandi sem hefur það hlutverk að auka tengsl fólks með geðraskanir við samfélagið með því að reka heimili þar sem félagsmenn fá aðstoð og uppörvun til að takast á við hið daglega líf. Leigubílstjóri í Rangárvallasýslu gefur Strók sína hæstu einkunn.

Strókur er með starfsemi sína í húsinu við Skólavelli 1 á Selfossi en starfssvæði klúbbsins nær yfir Árnessýslu, Rangárvallasýslu og Vestur Skaftafellssýslu. Starfsemi klúbbsins hófst 2005 og hefur farið vaxandi með ári hverju.

„Hingað leitar fólk sem hefur verið greint með einhverskonar geðraskanir eða félagslega einangrun, sem vill koma í félagslega virkni og félagsskap fyrst og fremst. Það er mjög mikilvægt að fólki hafi það í huga að ef það er t.d. komið út af vinnumarkaði að loka sig ekki af heima, sækja í einhverskonar úrræði eins og Strókur t.d. þar sem þú getur bæði fengið stuðning við að setja þér persónuleg markmið, bara hvað þú vilt gera til að halda rútínu og vera hluti af samfélaginu“, segir Guðrún Svala Gísladóttir, félagsráðgjafi og forstöðumaður Stróks.

Nokkrir félagsmenn Stróks eru duglegir að mála á meðan aðrir prjóna og undirbúa jólabasar sem haldinn verður laugardaginn 3. nóvember. Slátrið sýður í pottinum inn í eldhúsi en félagsmenn eru nýbúnir að gera slátur. Jóna Jónsdóttir er alsæl hjá Stróki.

„Ég bara blómstra hérna enda mæti ég hérna klukkan 08:30 á morgnanna, það er eins gott að það sé búið að opna og kaffið á könnunni tilbúið“, segir Jóna og skellihlær.

Jón Pálsson er leigubílstjóri í Rangárvallasýslu og er sá félagi í Stróki sem hefur notfært sér þjónustuna lengst.

„Mér líkar rosalega vel að vera hérna, það er alltaf jafn gott að koma hérna enda forstöðukonurnar alveg toppkonur og allt fólk sem kemur hérna inn. Ég gef því mína hæstu einkunn“.

Jón er mikill söngmaður og tekur stundum upp á því að syngja fyrir félaga sína í Stróki.