Eigendur Squishies-leikfanga gæti fyllstu varúðar

Notkun svokallaðra „Squishies“-leikfanga getur verið varasöm. Niðurstöður rannsóknar, sem danska umhverfisstofnunin framkvæmdi á tólf slíkum leikföngum, benda til að vörurnar innihaldi skaðleg efni, sem meðal annars geti valdið ófrjósemi og krabbameini. Neytendastofa telur því rétt að ráðleggja fólki, sem kann að finna fyrir óþægindum þegar það kreistir leikföngin, að láta af notkun þeirra.

Á vef stofnunarinnar segir að sérstök umræða hafi farið fram á vegum evrópskra eftirlitsstjórnvalda um Squishies-leikföngin. Þeim er lýst sem „kreisti“-leikföngum, en eins og lýsingin gefur til kynna eru þau mjúk og auðvelt er að kreista þau. Þau eru einföld að gerð og hönnun og segir Neytendastofa að enga sérstaka hæfni þurfi til að leika sér að þeim.

„Í þeim tilvikum sem leikföngin líta út eins og bangsar, afkvæmi dýra eða aðrar ungbarnavörur t.d. mjólkurpeli er ekki hægt að líta svo á að þau séu aðeins ætluð börnum eldri en þriggja ára,“ segir á vef Neytendastofu. Þar að auki megi finna í leikföngunum smáhluti sem geti valdið köfnunarhættu.

Stofnunin segist taka undir með stjórnvöldum á Norðurlöndunum - „sem hafa bent á að börn eða fullorðnir sem finni fyrir óþægindum í augum eða í öndunarvegi, eða finni fyrir óþægindum vegna lyktar frá squishies kreisti leikföngum eigi að forðast slík leikföng.“

Þau sem vilji hins vegar hafa slík leikföng á heimilinu ættu að gæta fyllstu varúðar. Í því samhengi nefnir Neytendastofa að sænsk eftirlitsstjórnvöld bendi neytendum á að kaupa ekki þessi leikföng fyrr en meira er vitað um þau og hvort að það séu skaðleg efni þeim.

Neytendastofa segist hyggjast fara í eftirlit í verslanir á næstunni vegna leikfanganna. Sambærilegar stofnanir í nágrannaríkjum Ísland munu þar að auki framkvæma prófanir á leikföngunum með tilliti til efnainnihalds, að sögn Neytendastofu.