Manninum sleppt úr haldi

Lögreglan á Norðurlandi eystra hefur ákveðið að sleppa manninum sem hefur verið í haldi vegna rannsóknar á andláti ungrar konu á Akureyri. Maðurinn er undir grun um að hafa ekki komið konunni til hjálpar. Rannsókn lögreglu á málinu er enn í gangi en ekki var talin ástæða til að halda manninum í gæsluvarðhaldi á grundvelli rannsóknarhagsmuna.

Konan fannst látin á heimili sínu á sunnudaginn en staðfest er að maðurinn var á vettvangi aðfaranótt sunnudags og á sunnudagsmorgun. Maðurinn hefur verið samstarfsfús við rannsókn lögreglu og gert ráðstafanir til að liðka fyrir rannsókn málsins. 

Maðurinn var úrskurðaður í gæsluvarðhald fyrir fjórum dögum sem átti að renna út á hádegi í dag.