Conte í startholunum og klár að taka við Real Madrid

Ítalski knattspyrnustjórinn Antonio Conte er sagður bíða eftir tilkynningu frá Real Madrid þess efnis að Julen Lopetegui verði látinn taka poka sinn hjá spænska stórveldinu og Conte taki við starfinu í kjölfarið.

Hvorki hefur gengið né rekið hjá Real Madrid í upphafi leiktíðar en liðið er með fjórtán stig eftir 9 leiki og tapaði á heimavelli fyrir Levante í gær.

Ítalskir fjölmiðlar telja sig hafa heimildir fyrir því að Conte sé í startholunum og hafi gert hæstráðendum hjá Madridarliðinu það ljóst að hann sé tilbúinn að taka við.

Spænskir fjölmiðlar höfðu áður greint frá því að Real Madrid hafi hlerað Conte í byrjun þessa mánaðar eða eftir tapið gegn CSKA Moskvu í Meistaradeild Evrópu. Síðan þá hafa tapast tveir deildarleikir, á móti Alaves og Levante.