Þrastalundur til leigu eins og hann leggur sig

Veitingastaðurinn Þrastalundur í Grímsnesi er til leigu eins og hann leggur sig, að sögn eiganda staðarins sem séð hefur um reksturinn síðan árið 2016. Hann segir ekkert enn þá „í hendi“ varðandi nýja leigjendur, en vonast til þess að „reynslumikill aðili“ taki við rekstrinum.

Sjá einnig: Brönsinn í Þrastalundi á milli tannanna á fólki

Í auglýsingu sem birt var á Facebook-síðu Þrastalundar í síðustu viku kemur fram að Þrastalundur sé til leigu. Þó segir einnig í auglýsingunni að veitingastaðurinn sé til sölu, og það „af sérstökum ástæðum“. Í svari við fyrirspurn Vísis, þar sem óskað var eftir nánari skýringum á þessu, segir Sverrir Einar Eiríksson eigandi staðarins að auglýst sé eftir leigjendum.

„Þrastalundur er til leigu eins og hann leggur sig með öllum tækjum og tólum.“

Stóð aldrei til að hefja veitingarekstur

Inntur eftir því af hverju hann hafi ákveðið að setja staðinn á leigu segir Sverrir að í raun hafi aldrei staðið til að hefja veitingarekstur.

„Ég keypti staðinn fyrir sirka þremur árum og opnaði í júlí 2016. Það stóð í raun aldrei til hjá mér að fara í veitingarekstur og það eru fjölmargir aðilar á Íslandi sem hafa getu, þekkingu og reynslu til að reka stað eins og þennan. Ég er búinn að leggja pening og tíma í þennan stað og mér þykir óendanlega vænt um hann, eins og velflestum Íslendingum.“

Vænlegur leigjandi ekki fundinn enn

Aðspurður segir Sverrir að reksturinn hafi gengið þokkalega undanfarna mánuði, og öllu betur á sumrin en á veturna. Enn hefur enginn vænlegur leigjandi gert tilboð í staðinn en Stefán segir þó að mikið hafi verið hringt og spurt um reksturinn.

„Ég vonast til þess að fá reynslumikinn aðila sem getur tekið boltann og gert þennan stað að því sem hann getur orðið.“

En hvað tekur við hjá Sverri, nú þegar veitingareksturinn er að baki?

„Ég hef ekki haft mikil afskipti af daglegum rekstri undanfarið ár þannig að lífið heldur áfram sinn vanagang.“

Þrastalundur er vinsæll áfangastaður á Suðurlandi en þangað leggja ferðamenn og áhrifavaldar reglulega leið sína. Staðurinn hefur ítrekað ratað í fjölmiðla undanfarin ár, til að mynda vegna sýnileika á samfélagsmiðlum og verðlags – sem hefur þótt hátt. Þess má jafnframt geta að tvisvar hefur verð á vörum í Þrastalundi verið lækkað eftir símhringingar frá blaðamönnum.

Þá hefur eigandinn sjálfur, Sverrir Einar, einnig fangað athygli fjölmiðla fyrir margvísleg viðskipti, til að mynda með íbúðir, pizzur og gull.