Margrét hættir sem þjálfari kvennaliðs Breiðabliks

Kvennalið Breiðabliks leitar nú að nýjum þjálfara fyrir liðið sitt en Margrét Sturlaugsdóttir hefur óskað eftir því að stíga til hliðar sem þjálfari liðsins.

Breiðabliksliðið hefur tapað öllum átta leikjum sínum í deildinni og situr á botninum. Blikar hafa verið inn í flestum leikjum og einum þeirra tapaði liðið í framlengingu.

Blikar urðu síðan fyrir miklu áfalli þegar landsliðskonan Isabella Ósk Sigurðardóttir sleit krossband á dögunum.

Margrét hefur sjálf verið að glíma við erfið veikindi og ætlar nú að huga að heilsu sinni.

Blikar sendu Karfan.is tilkynningu og er hún hér fyrir neðan.

Tilkynning frá Breiðablik:

Margrét Sturlaugsdóttir hefur óskað eftir því við félagið að fá að stíga til hliðar sem þjálfari meistaraflokks kvenna.

Ákvörðun þessi er tekin af yfirvegun og í mesta bróðerni. Margrét hefur verið að glíma við erfið veikindi og ætlar nú að huga að heilsunni.

Breiðablik vill þakka Margréti fyrir vel unnin störf í þágu félagsins og óskar henni alls hins besta í framtíðinni.

Blikar hefja nú leit af þjálfara en samkvæmt tilkynningu er leitin hafin. Næsti leikur Breiðabliks er þann 25. nóvember næstkomandi en landsleikjahlé er í gangi í Dominos deild kvenna þessa dagana.