Fyrirliðinn stressaður fyrir að opna sig fyrir þjóðinni

Aron Einar Gunnarsson, landsliðsfyrirliði í fótbolta, spilar sinn fyrsta leik undir stjórn Erik Hamrén á fimmtudagskvöldið þegar að strákarnir okkar mæta Belgíu í lokaleik liðsins í Þjóðadeildinni í beinni útsendingu á Stöð 2 Sport HD klukkan 19.45.

Aron hefur glímt við mikil meiðsli að undanförnu en er kominn í gang með félagsliði sínu Cardiff og er klár í slaginn fyrir leikinn á móti einu besta liði heims eftir tvo daga.

Þrátt fyrir að spila lítið eftir HM þar sem hann var einnig meiddur hefur hann ekki setið aðgerðarlaus. Aron hefur verið að skrifa ævisögu sína sem kemur út í vikunni og verður hluti af jólabókaflóðinu.

Skrifar til næstu kynslóða

Hugmyndin hefur verið lengi í kolli fyrirliðans. Hann vaknaði ekki bara einn daginn og ákvað að gefa út bók. „Þetta var aðeins lengra ferli en það,“ segir Aron og hlær í viðtali við Vísi á hóteli landsliðsins.

„Þessi hugmynd kviknaði fyrir löngu síðan en þá vissi ég ekki hvort ég myndi geta eitthvað í fótbolta. Með árangrinum þá kviknaði meiri áhugi á þessu inn í mér. Ég veit ekki hvort mér hafi fundist ég skyldugur til að miðla reynslu minni til næstu kynslóða. Það blundaði samt í mér að miðla því sem það tók okkur að ná þessum árangri,“ segir fyrirliðinn.

Þetta hefur verið langt ferli og eftir því sem árangurinn varð meiri fór Aron að skrifa meira og meira hjá sér sem gæti gagnast lesendum og komandi kynslóðum.

„Í undankeppni EM byrjaði ég að punkta hjá mér hvað var í gangi og eitt leiddi af öðru og ég hélt áfram og svo hélt árangurinn áfram. Mig langaði fyrst að greina bara frá EM og HM en svo þegar ég settist niður með rithöfundinum þá varð þetta að ævisögu sem varð mjög skemmtilegt,“ segir hann.

Ekki sjálfgefið

„Þetta var skemmtileg reynsla. Einar varð eins og sálfræðingur fyrir mig. Ég var að rifja upp hluti sem ég þurfti að ganga í gegnum til þess að ná þessum árangri; fjölskyldumál og svona. Þetta var skemmtilegt ferli sem ég var stoltur og ánægður með. Ég er stressaður fyrir því núna að fólk fái að kynnast þessari persónu frekar en viðtals-Aroni,“ segir Aron.

Miðjumaðurinn öflugi hefur náð svakalegum árangri á ferlinum en norðanmaðurinn hefur sjaldan verið stressaðari en fyrir útgáfu bókarinnar.

„Það er ekki sjálfgefið að komast á tvö stórmót í röð verandi frá Íslandi. Ég er spenntur fyrir þessu en smá stressaður að fólk kynnist persónunni á bak við íþróttamanninn. Þarna sýni ég hvernig áhuga ég hef á fótbolta og öðrum hlutum. Ég er stressaðari fyrir þessu en að spila fyrir framan 80.000 manns á móti Frakklandi. Það hef ég gert alla ævi. Þetta er öðruvísi hlið á sjálfum mér,“ segir Aron Einar Gunnarsson.