Bernardo Bertolucci látinn

Ítalski kvikmyndaleikstjórinn Bernardo Bertolucci er látinn. Bertolucci vann níu Óskarsverðlaun á ferli sínum, öll fyrir myndina The Last Emperor, en á meðal annarra mynda hans eru The Last Tango in Paris og The Conformist.

Bertolucci, sem var einn fremsti leikstjóri heims, var 77 ára þegar hann lést. Á vef Variety er haft eftir Flaviu Schiavi, talskonu Bertolucci, hafi dáið í morgun úr krabbameini.

Á Óskarsverðlaunahátíðinni 1987 var The Last Emperor valin besta kvikmyndin en myndin fjallar um síðasta kínverska keisarann, Pu Yi.

 

Bertolucci vann Óskarinn sem besti leikstjórinn og var fyrsti ítalski leikstjórinn sem hlaut þann heiður. Þá var handritið að The Last  valið það besta en það var byggt á sjálfsævisögu Pu Yi.

Kvikmyndaferill Bertolucci hófst á sjöunda áratugnum en hann var í hópi ítalskra leikstjóra sem urðu þekktir fyrir framúrstefnulegar myndir á sjöunda og áttunda áratugnum.

Sjá einnig:Eitt umdeildasta nauðgunaratriði í sögu Hollywood var raunveruleg nauðgun

Bertolucci gerði síðan garðinn frægan í Hollywood en myndin sem gerði hann heimsfrægan, og alræmdan, var Last Tango in Paris sem skartaði þeim Marlon Brando og Mariu Schneider í aðalhlutverkum.

 

Í myndinni var nauðgunaratriði sem Bertolucci upplýsti um í viðtali árið 2013 að hefði verið raunveruleg nauðgun. Schneider vissi nefnilega ekki hvernig atriðið var þegar hún „lék“ í því á móti Brando.

Bertolucci kvaðst ekki hafa séð eftir því að hafa gert atriðið á þennan hátt þó að hann væri með samviskubit yfir því.

Schneider var aðeins 19 ára gömul þegar hún lék í myndinni en Brando 48 ára.

Gagnrýnendur héldu ekki vatni yfir frammistöðu Schneider og sagði Roger Ebert meðal annars að svo virtist sem Schneider væri ekki að leika heldur geislaði einfaldlega af henni.

Það er að minnsta kosti ljóst að Schneider var ekki að leika í nauðgunaratriðinu þar sem persóna Brando notar smjör til þess að hann eigi auðveldara með að nauðga stúlkunni.

Í viðtalinu frá árinu 2013 segir Bertolucci að hann og Brando hafi fengið hugmyndina að atriðinu yfir morgunmatnum daginn áður en það var tekið upp. Hann hafi hins vegar ákveðið að segja Schneider ekki frá því en það hefði verið hræðileg framkoma af hans hálfu.