Segir nokkra á Íslandi hafa fyrirfarið sér vegna skjáfíknar

Sálfræðingurinn Eyjólfur Örn Jónsson fullyrðir að nokkrir sem sóttu meðferð hjá honum hafi svipt sig lífi vegna skjáfíknar. Þetta segir hann í þættinum Sítengd sem er sýndur í ríkissjónvarpinu.

„Ég hef verið að vinna með einstaklingum sem hafa endað á því að taka eigið líf. Þeir voru á aldrinum fimmtán til tuttugu ára. Sem betur fer hafa þeir ekki verið margir. En það hefur endað þannig,“ er haft eftir Eyjólfi á vef Ríkisútvarpsins.

Eyjólfur er sagður hafa sérhæft sig í meðhöndlun á fólki með tölu- eða skjáfíkn. Hann segir flesta sem leita sér hjálpar á Íslandi vera á aldrinum 15 til 25 ára. Hann segir þessa einstaklinga þroskast hægar en jafnaldra sína þar sem þeir taki ekki þátt í lífinu eins og aðrir.

Hann segir þessa einstaklinga fasta í vítahring þar sem þeir upplifa tölvuna sem einhverskonar bjargvætt frá depurð og miklu þunglyndi. Tilhugsunin að fara frá tölvunni jafngildi því að deyja.

„Þegar það verður raunin, þá sjáum við oft einstaklinga fara yfir það að pissa í flöskur og kúka í kassa jafnvel. Þeir bara stíga ekki upp frá tölvunni því að tilhugsunin er, ef ég stíg upp frá tölvunni þá langar mig ekki að vera til lengur,“ er haft eftir Eyjólfi.

Fréttastofa Stöðvar 2 ræddi við Eyjólf í sumar þar sem hann sagðist hafa þjónustað um 3.000 skjólstæðinga vegna tölvufíknar. Hann sagðist þá þekkja dæmi þess að börn hafi hótað að svipta sig í lífi í hvert sinn sem foreldrið reynir að fá það úr tölvunni.



Fólk með sjálfsvígshugsanir er minnt á Hjálparsíma Rauða krossins, 1717, og netspjallið. Þjálfaðir og reynslumiklir sjálfboðaliðar á öllum aldri svara þeim símtölum og spjöllum sem berast. Fullum trúnaði er heitið.

Nánari upplýsingar hér.