Bein útsending: Kvöldfréttir Stöðvar 2

Seðlabankastjóri segir innistæðu hafa verið fyrir málarekstri bankans gegn Samherja, þrátt fyrir nýuppkveðinn dóm Hæstaréttar. Hann óttast ekki málsókn Samherja en segir það koma til greina að leita réttar síns vegna mögulegra ærumeiðinga. Rætt verður við Má Guðmundsson í kvöldfréttum Stöðvar 2 klukkan hálf sjö.

Við ræðum við Eirík Bergmann um stöðu Brexit-samningsins. Leiðtogar aðildarríkja Evrópusambandsins samþykktu í dag útgöngusamning Breta úr sambandinu. Á blaðamannafundi var samhljómur um að þetta væri besti og eini mögulegi samningurinn miðað við aðstæður. Framhaldið er nú í höndum breska þingsins.

Móðir sex ára drengs sem lagður er í gróft einelti segist algjörlega ráðalaus. Hún sé að bugast á ástandinu. Sérfræðingur í eineltismálum segir nokkuð algengt að börn allt niður í leikskólaaldur verði fyrir einelti.

Sala smjörs á Íslandi hefur aukist um rúmlega níutíu prósent á síðustu tíu árum. Skrifstofustjóri Samtaka afurðastöðva í mjólkuriðnaði segir byltingu hafa orðið í sölu á fituríkari afburðum. 

Svokallað verkfærasafn hefur nú verið opnað og segja stofnendur markmiðið að auka aðgengi að verkfærum sem ekki væri forsenda fyrir einstakling að fjárfesta í. Til hvers að kaupa sér verkfæri sem fer í geymslu eftir að hafa verið notað í eitt skipti? Við kíkjum á nýja safnið.

Þetta og margt fleira í kvöldfréttum Stöðvar 2 klukkan 18:30.