Atletico lagði Alaves í toppbaráttuslag

Atletico Madrid vann góðan sigur á Alaves í fyrsta leik dagsins í spænsku úrvalsdeildinni. Um var að ræða toppbaráttuslag þar sem bæði lið eru að berjast við toppinn en einu stigi munaði á liðunum í 3. og 4.sæti deildarinnar þegar kom að leiknum í dag.

Nikola Kalinic kom Atletico Madrid á bragðið á 25.mínútu og reyndist það eina mark fyrri hálfleiks.

Heimamenn í Atletico gerðu svo út um leikinn á lokamínútunum. Antoine Griezmann tvöfaldaði forystuna á 82.mínútu og Rodri gerði endanlega út um leikinn á lokamínútu venjulegs leiktíma. Lokatölur 3-0 fyrir Atletico Madrid.

Liðsmenn Diego Simeone þar með búnir að jafna topplið Barcelona að stigum en Börsungar eiga reyndar leik til góða gegn grönnum sínum í Espanyol í dag.