Bein útsending: Kvöldfréttir Stöðvar 2

Lögreglan á höfuðborgarsvæðinu rannsakar nú þaulskipulögð fjársvik sem beinast gegn tryggingafélögunum og gætu hlaupið á tugum milljóna. Grunur leikur á að erlendir glæpahópar sendi menn til landsins til þess að sviðsetja árekstra og svíkja þannig fé af tryggingafélögunum.

Að sögn framkvæmdastjóra Samtaka fjármálafyrirtækja má gera má ráð fyrir að tryggingasvik hér á landi nemi nokkrum milljörðum króna á ári. Tjónagrunnur að norrænni fyrirmynd verður tekinn í gagnið á næstunni til að sporna gegn því að tryggingatakar borgi fyrir svikin með hækkun iðgjalda. 

Fjallað verður nánar um málið í kvöldfréttum á samtengdum rásum Stöðvar 2, Bylgjunnar og Vísis.

Klaustursmálið hefur haft þær pólitísku afleiðingar að það kemur í hlut nýs þingnefndarformanns að leiða til lykta eitt stærsta mál þingsins, samgönguáætlun, og það strax í næstu viku. Breytingin gæti orðið til þess að skýr skilaboð verði gefin um veggjöld til að flýta framkvæmdum.

Ekki er útlit fyrir miklar hækkanir á olíuverði á næstunni því eftir fund OPEC-ríkjanna í Vínarborg í dag gáfu ríkin í skyn að framleiðsla í janúar yrði skert minna en búist hafði verið við. Markaðsaðilar reiknuðu með ákvörðun um mikla skerðingu til að draga úr offramboði á hráolíu sem hefur lækkað um 30 prósent síðan um miðjan október.

Rætt verður við forstjóra Flugfélagsins Ernis um tillögu að niðurgreiðslum á flugfargjöldum til íbúa landsbyggðarinnar. Hann segir þær geta orðið lyftistöng fyrir innanlandsflugið og fjölgað farþegum, ef vel tekst til með útfærsluna.

Við fylgdumst dagskránni í tilefni af Degi íslenskrar tónlistar og verðum í beinni frá æfingu Karlakórs Reykjavíkur. Þetta og margt fleira í Kvöldfréttum Stöðvar 2 klukkan 18:30.