Heimavellir ætla að sækja sér allt að 12 milljarða 

Heimavellir, stærsta íbúðaleigufélag landsins, stefnir að því að gefa út skuldabréf fyrir allt að tólf milljarða króna í því augnamiði að endurfjármagna langtímaskuldir félagsins á hagstæðari kjörum. Í fyrsta útboði félagsins undir þeim útgáfuramma, sem lauk síðastliðinn mánudag, tókst Heimavöllum að selja fjárfestum skuldabréf fyrir tæplega fjórðung þeirrar upphæðar, eða samtals 3.180 milljónir króna.

Fram kom í tilkynningu Heimavalla til Kauphallarinnar að félagið hefði annars vegar samþykkt tilboð fyrir 2.300 milljónir í skuldabréfaflokk sem er til 30 ára og ber 3,65 prósenta fasta verðtryggða vexti og hins vegar skuldabréf til 7 ára sem bera 3,2 prósenta fasta verðtryggða vexti. Stefnt er að skráningu skuldabréfanna fyrir lok apríl 2019.

Samkvæmt heimildum Markaðarins hófu fulltrúar Arion banka, ráðgjafa Heimavalla, fundaröð með fjárfestum snemma í síðustu viku vegna skuldabréfaútboðsins. Fram kemur í kynningu til fjárfesta, sem Markaðurinn hefur undir höndum, að íbúðaleigufélagið gefi út tvo nýja skuldabréfaflokka. Annar flokkurinn er til allt að sjö milljarðar króna að stærð og gildir til þrjátíu ára en hinn allt að fimm milljarðar króna að stærð og til sjö ára.

Í lok þriðja ársfjórðungs námu vaxtaberandi skuldir leigufélagsins samtals um 36,6 milljörðum króna. Vaxtakjör Heimavalla eru um 4,4 prósent að meðaltali á verðtryggðum langtímalánum, sem eru um 32 milljarðar, en stjórnendur félagsins hafa sagt að um tíu punkta lækkun á meðalvaxtakostnaði feli í sér um 35 milljóna króna sparnað. Í áðurnefndri fjárfestakynningu er sérstaklega tekið fram að með útgáfu skuldabréfanna hyggist Heimavellir endurfjármagna lán frá Íbúðalánasjóði, svonefnd leiguíbúðalán, sem og bankalán en þau fyrrnefndu eru óhagstæðustu lánin í safni félagsins.

Lánin frá Íbúðalánasjóði námu um 18,6 milljörðum króna í lok síðasta árs og bera meðalvexti upp á 4,6 prósent. Þau eru meðal annars bundin því skilyrði að lántakinn sé ekki rekinn í hagnaðarskyni og hann greiði jafnframt ekki út arð til hluthafa en stefna Heimavalla til framtíðar er að greiða út arð með reglubundnum hætti.



Leiðrétting: Í upphaflegri útgáfu fréttarinnar kom fram að Heimavellir hefðu ætlað að sækja sér 12 milljarða króna í skuldabréfaútboði félagsins sem lauk sl. mánudag. Hið rétta er að félagið er búið að skilgreina útgáfuramma fyrir útgáfu skuldabréfa, fyrir samtals allt að 12 milljarða, og munu Heimavellir gefa út skuldabréf í nokkrum útboðum undir þeim ramma á þessu ári og næsta ári. Beðist er velvirðingar á mistökunum.