Innlent

Borgin greiðir helming af kostnaði við hin umdeildu pálmatré

Kristín Ólafsdóttir skrifar
Listaverkið Pálmatré eftir þýska listamanninn Karinu Sanders, varð hlutskarpast í einni viðamestu samkeppni um útilistaverk sem efnt hefur verið til í Reykjavík.
Listaverkið Pálmatré eftir þýska listamanninn Karinu Sanders, varð hlutskarpast í einni viðamestu samkeppni um útilistaverk sem efnt hefur verið til í Reykjavík. Mynd/Reykjavíkurborg
Listaverkið Pálmatré sem rísa mun í nýju hverfi Vogabyggðar mun kosta Reykjavíkurborg og lóðaeigendur samtals 140 milljónir króna. Kostnaðurinn skiptist til helminga og hefur hann legið fyrir síðan í fyrra. Fulltrúar minnihlutans í borgarstjórn hafa margir gagnrýnt fyrirætlanir meirihlutans á samfélagsmiðlum í kvöld.

Efnt var til samkeppni um útilistaverk í Vogabyggð í fyrra og strax lá fyrir að verja ætti allt að 140 milljónum króna til kaupa á einu eða fleiri listaverkum. Var það sagt í samræmi við stefnu borgaryfirvalda og jafnframt hluti af samningsmarkmiðum við lóðaeigendur í Vogabyggð.

Samningsmarkmið vegna nýrra uppbyggingarsvæða í Reykjavík gera enda ráð fyrir að ákveðinni fjárhæð verði varið í listsköpun í almenningsrýmum á svæðinu og verði sú fjárhæð hluti af heildarstofnkostnaði innviða á viðkomandi svæði.

Pálmatrjánum hefur verið líkt við stráin frægu sem gróðursett voru við braggann í Nauthólsvík. Stráin kostuðu samtals yfir 1,1 milljón króna.Vísir/Vilhelm
Bjarni Brynjólfsson upplýsingafulltrúi Reykjavíkurborgar segir í samtali við Vísi í kvöld að kostnaðurinn við verkið skiptist til helminga. Reykjavíkurborg greiði þannig 70 milljónir fyrir verkið, sem komi af byggingarréttargjöldum á svæðinu. Þá sé heildarkostnaðurinn, þ.e. 140 milljónir króna, um eitt prósent af byggingarréttargjöldunum.

„Dönsk strá og pálmatré. Allt fyrir borgarfé.“

Pálmatrén eru sköpunarverk þýsku listakonunnar Karinu Sanders. Verkið gerir ráð fyrir að tveimur pálmatrjám verði komið fyrir í stórum turnlaga gróðurhúsum sem sett verða niður við jaðar miðlægs torgs við bakka svokallaðs Ketilbjarnarsíkis.

Fyrirhugaðar áætlanir um uppsetningu verksins hafa vakið töluverð viðbrögð á samfélagsmiðlum. Hefur kostnaður við verkið verið gagnrýndur og pálmatrjánum líkt við innfluttu stráin við braggann í Nauthólsvík. Framkvæmdir við braggann fóru rúmum 250 milljónum króna fram úr kostnaðaráætlunum, eins og frægt er orðið.

Eyþór Arnalds borgarfulltrúi Sjálfstæðisflokksins, Kolbrún Baldursdóttir borgarfulltrúi Flokks fólksins og Sanna Magdalena Mörtudóttir borgarfulltrúi Sósíalistaflokksins hafa öll vakið athygli á málinu á Facebook í kvöld. „Dönsk strá og pálmatré. Allt fyrir borgarfé,“ skrifar Eyþór.

Kolbrún er öllu afdráttarlausari og spyr: „Er borgarmeirihlutinn að tapa sér?“ Þá segir Sanna að forgangsröðun meirihlutans sé ekki í takt við raunveruleikann.



Þá veltir Gunnar Smári Egilsson formaður Sósíalistaflokksins því upp hvort kostnaðurinn við pálmatrén sé ekki nokkuð hár, sérstaklega í ljósi þess að framkvæmdir á vegum borgarinnar hafi farið fram úr áætlun síðustu misseri.

Hér að neðan má svo sjá frekari vangaveltur um pálmatrén umdeildu.

Borgarstjórn Reykjavík Skipulag Styttur og útilistaverk

Tengdar fréttir

Pálmatré og 30 metra hár ljósastaur rísa í Vogabyggð

Listaverkið Pálmatré eftir þýska listamanninn Karinu Sanders, varð hlutskarpast í einni viðamestu samkeppni um útilistaverk sem efnt hefur verið til í Reykjavík. Verkið mun rísa í nýju hverfi Vogabyggðar en í umsögn dómnefndar segir að tillagan sé í senn "óvænt, skemmtileg og djörf.“

Mest lesið


Fleiri fréttir

Sjá meira


×

Mest lesið