Verða á bakvakt á vinnustöðinni

Byggðarráð Rangárþings ytra segir að breytt fyrirkomulag sjúkraflutninga í Rangárþing hafi skýrst að nokkru leyti á fundi með forstjóra og hluta framkvæmdastjórnar Heilbrigðisstofnunar Suðurlands um miðjan mánuðinn.

„Annars vegar þá kynnti forstjórinn þar fyrir sveitarstjórn að þessar bakvaktir sem setja skal inn frá og með 1. febrúar verða mannaðar með sama fólki og sinnir staðbundnum vöktum nú. Þannig segja þau að sjúkraflutningamenn verði staðsettir í aðstöðu HSU á Hellu hvort sem þeir eru á staðbundnum vöktum eða bakvöktum,“ segir í minnisblaði sem ráðið sendi forstjóra HSU til „að fá það staðfest að það sem þar kemur fram sé rétt eftir haft.“