Ákærður fyrir kynferðisbrot gegn þroskaskertri konu sem ól barn

Hjúkrunarfræðingur sem starfaði á Hacienda Healthcare-hjúkrunarheimilinu í Arizona í Bandaríkjunum hefur verið handtekinn og ákærður fyrir kynferðisbrot. Maðurinn er grunaður um að hafa nauðgað alvarlegra þroskaskertri konu á hjúkrunarheimilinu með þeim afleiðingum að hún ól barn í desember síðastliðnum.

Sjá einnig: „Við höfðum ekki hugmynd um að hún væri ólétt“

NBC-fréttastofan hefur eftir lögregluyfirvöldum í Phoenix að hinn 36 ára Nathan Sutherland hafi verið ákærður fyrir kynferðisofbeldi og ofbeldi gegn ósjálfráða einstaklingi. Sutherland vann sem hjúkrunarfræðingur á hjúkrunarheimilinu, þar sem konan hafði legið í áratug.

Ekki í dái en alvarlega þroskaskert

Þolandinn er 29 ára gömul kona sem ól heilbrigt sveinbarn þann 29. desember síðastliðinn. Í fyrstu fréttum af málinu sagði að konan hefði verið í dái í frá þriggja ára aldri.

Þetta var leiðrétt í yfirlýsingu sem fjölskylda konunnar sendi frá sér í vikunni en þar segir að konan sé ekki í dái heldur alvarlega þroskaskert sökum floga sem hún fékk á barnsaldri. Hún geti ekki talað en hafi takmarkaða hreyfigetu í höndum, fótum og höfði. Þá bregðist hún við hljóðum og geti sýnt svipbrigði.

Málið vakti mikinn óhug og hneykslan þegar fyrst var fjallað um það í byrjun mánaðar en starfsfólk hjúkrunarheimilisins segist ekki hafa haft hugmynd um að konan væri ólétt fyrr en hún byrjaði að fæða barnið.

Lögregla fór í kjölfarið fram á lífsýnatöku á öllum karlkyns starfsmönnum hjúkrunarheimilisins. Framkvæmdastjóri stofnunarinnar og einn af læknum konunnar sögðu af sér vegna málsins.