Stuðningsmaður United berst fyrir lífi sínu eftir árás leigubílsstjóra

Stuðningsmaður Manchester United liggur illa haldinn á sjúkrahúsi eftir að hafa verið stunginn af leigubílsstjóra í Parísarborg.

Stuðningsmaðurinn var ásamt þremur öðrum í leigubíl á leiðinni af vellinum eftir ótrúlegan 3-1 sigur Manchester United á PSG.

Leigubílsstjórinn tók illa í að hópurinn væri syngjandi stuðningsmannasöngva í bílnum og stoppaði bifreiðina. Hann sagði þeim að fara út úr bílnum, tók fram hníf og ógnaði konu í hópnum eftir því sem segir í frétt Sky Sprts.

Fórnarlambið reyndi að grípa inn í og vernda konuna en þá stakk leigubílsstjórinn hann í bringuna.

Félagar hans komu manninum á sjúkrahús með aðstoð annara vegfaranda og fór hann strax í bráðaaðgerð.

Í hádeginu í dag var maður handtekinn í tengslum við málið en vopnið hefur ekki verið fundið.