„Aðþrengd eiginkona“ á meðal ákærðra í háskólasvikamyllu

Sjónvarpsleikkonur eins og Felicity Huffman og Lori Loughlin eru á meðal tuga manna sem hafa verið ákærðir fyrir að taka þátt í svikamyllu til að koma nemendum inn í nokkra virtustu háskóla Bandaríkjanna og svindla á inntökuprófum.

Alríkissaksóknarar í Boston hafa ákært að minnsta kosti fjörutíu manns í tengslum við sviksamlegar skráningar á nemendum í háskólum eins og Yale, Georgetown, Stanford og UCLA. Í ákærunum sem gerðar voru opinberar í dag er því haldið fram að svikamyllunni hafi verið ætlað að hjálpa auðugum Bandaríkjamönnum að greiða fyrir því að börnin þeirra kæmust inn í bestu skólana.

Fyrirtæki manns að nafni William Singer er sagt hafa selt þjónustu þar sem það útvegaði fólk til að taka inntökupróf í háskólana fyrir börn viðskiptavina þess. Í sumum tilfellum hafi það komið því þannig fyrir að börnin hafi verið skráð á íþróttastyrk jafnvel þó að þau væru ekki íþróttafólk, að sögn Reuters-fréttastofunnar.

Um 33 foreldri eru ákærð í málinu, þar á meðal Huffman og Loughlin. Huffman er þekktust fyrir hlutverk sitt í þáttunum „Aðþrengdar eiginkonur“ en Loughlin hefur leikið í gamanþáttunum „Fullu húsi“. Auk þeirra hafa þrettán þjálfarar við háskóla og samstarfsmenn fyrirtækis Singer verið ákærðir.

Fréttastofa NBC-sjónvarpsstöðvarinnar segir að ekkert bendi til þess að háskólarnir hafi tekið þátt í svindlinu.