Leitar að ungri frænku sinni meðal fjölskyldna ISIS-liða

Mustafa Tarbouni leitar að ungri stúlku meðal tuga þúsunda fjölskyldumeðlima ISIS-liða sem eru í haldi sýrlenskra Kúrda. Hann er að leita að frænku sinni sem rænt var frá Frakklandi fyrir fjórum og hálfu ári síðan. Fjölskylda barnsins Jönu, taldi að faðir hennar væri að fara með hana í frí til fjölskyldu hans Marokkó. Þess í stað tók hann barnið til Sýrlands og gekk til liðs við Íslamska ríkið.

Fjölskyldan hefur ekki séð Jönu síðan en Tarbouni vonast til þess að geta borið kennsl á hana vegna fæðingarbletts á læri hennar. Hann fór frá Frakklandi til Sýrlands með því markmiði að finna stúlkuna og biðlar til yfirvalda Frakklands um að hjálpa sér.

AFP fréttaveitan hefur eftir Tarbouni að síðast hafi sést til Jönu í Sýrlandi í janúar. Nánar tiltekið í þorpi nærri Baghouz, síðasta bæ kalífadæmis Íslamska ríkisins, en þorpið er nú rústir einar. Hann getur eða vill ekki segja til um hvernig hann veit það.



Það var í ágúst 2014 sem faðir Jönu, Eddy Lerroux, fór með hana til Sýrlands. Með honum var, Jihane Makhzoumi, kona hans, og þrjú börn hennar. Hann dó í Palmyra árið 2015 og Makhzouomi var handtekin í október 2016 þegar hún reyndi að komast aftur til Frakklands. Með henni voru börnin hennar þrjú en Tarbouni segir hana hafa skilið Jönu eftir í Sýrlandi hjá konu frá Líbíu sem kenndi ISIS-liðum og fjölskyldum þeirra arabísku.

Þarf leyfi frá Frakklandi

Fjölskyldumeðlimum ISIS-liða er haldið í búðum sem bera nafnið Al-Hol. Þar eru um 6.500 erlend börn á meðal annarra þúsunda barna ISIS-liða. Yfirvöld Frakklands áætla að minnst 80 frönsk börn séu í Sýrlandi.

Tarbouni segist hafa varið árum í að leita að Jönu og meðal annars hafi hann reynt að fá mörg ráðuneyti Frakklands til að aðstoða sig en án árangurs. Fjölskylda Jönu hefur einnig verið í sambandi við Rauða Krossinn.

Enn sem komið er hefur Tarbouni ekki fengið leyfi til að fara í Al-Hol búðirnar en hann segist þurfa leyfi frá Utanríkisráðuneyti Frakklands. Hann segir lögmann sinn hafa lagt fram beiðni á mánudaginn en henni hafi ekki verið svarað enn.

Hjálparsamtök og Sameinuðu þjóðirnar hafa kallað eftir því að heimaríki erlendra barna taki þau heim sem fyrst.

Tarbouni segir foreldra þeirra hafa tekið þá ákvörðun að ganga til liðs við hryðjuverkasamtökin. Börnin hafi ekki átt neinna annarra kosta völ.