Sendu sérsveitir gegn flóttamönnum sem höfðu tekið yfir stjórn skips

Yfirvöld Möltu sendu sérsveitir hersins gegn flóttamönnum sem höfðu tekið yfir stjórn tankskipsins Elhiblu 1 á Miðjarðarhafi. Áhöfn skipsins hafði komið rúmlega hundrað flóttamönnum og farandfólki til bjargar undan ströndum Líbíu. Þegar þeim var sagt að þau yrðu að öllum líkindum send aftur til Líbíu, þar sem skipið var á leið þangað, tóku þau yfir stjórn skipsins og sögðu skipstjóra þess að sigla í norðurátt.

Í yfirlýsingu frá herafla Möltu segir að samband hafi náðst við skipstjóra skipsins þegar skipinu var stefnt til Möltu. Hann sagðist ekki vera við stjórn skipsins og að verið væri að þvinga hann og áhöfn áhöfnina með hótunum.

Herskip voru send til móts við tankskipið ásamt þyrlu og fóru sérsveitarmenn um borð. Skipið er nú komið til hafnar í Möltu, samkvæmt AP fréttaveitunni.



Ekki er ljóst hvað verður um flótta- og farandfólkið. Matteo Salvini, innanríkisráðherra Ítalíu, segir að um fyrsta „sjórán“ flóttafólks sé að ræða.

Evrópusambandið hefur hætt varðsiglingum um Miðjarðarhafið að beiðni yfirvalda Ítalíu. Þeim siglingum var ætlað að koma í veg fyrir flutninga smyglara til Evrópu og bjarga fólki í kröggum. Tugum þúsunda hefur verið bjargað á fjórum árum. Yfirvöld Möltu og Ítalíu hafa lokað höfnum sínum fyrir skipum sem bjargað hafa fólki af Miðjarðarhafinu

Dregið hefur þó verulega úr flæði fólks yfir Miðjarðarhafið í kjölfar umdeilds samkomulags ESB við Líbíu sem felur í sér að fólkinu er haldið í sérstökum búðum í Líbíu. Evrópusambandið lætur strandgæslu Líbíu vita af ferðum flótta- og farandfólks og eru skip send til að flytja fólkið í búðirnar.

Mannréttindasamtök segja aðstæður flótta- og farandfólks í Líbíu þó vera hræðilegar. Þeim sé misþyrmt, þau séu jafnvel pyntuð og nauðganir og þrælahald sé algengt.