FME skoðar Hluthafa

Fjármálaeftirlitið hefur tekið vefinn Hluthafi til skoðunar þar sem fólki gefst kostur á að leggja fram hlutafé í nýtt almenningshlutafélag sem er ætlað annað hvort að taka þátt í endurreisn WOW air eða stofnun nýs lággjaldaflugfélags. 

Er ætlun Fjármálaeftirlitsins að fara ítarlega yfir málið í dag en til skoðunar er hvort vefurinn og söfnunin samrýmist lögum um verðbréfaviðskipti sem Fjármálaeftirlitið hefur eftirlit með. Talið er líklegt að einhver niðurstaða muni fást í málið í dag. 

Umsjónarmaður vefsins er Friðrik Atli Guðmundsson en vefurinn er kostaður af byggingarfyrirtæki föður hans, Sólhúsi ehf. Friðrik sagði í samtali við fréttastofu fyrr í dag að aðstandendur vefsins hefðu ekki sett sér markmið um að ná tiltekinni lágmarksfjárhæð til stofnunar félagsins. Hópurinn sem stendur að vefnum er ótengdur Skúla Mogensen, fyrrverandi forstjóra WOW air.