Allt opið á toppnum í Þýskalandi eftir jafntefli Bæjara

Bayern München missteig sig í toppbaráttunni í þýsku úrvalsdeildinni í knattspyrnu í kvöld en þeir gerðu 1-1 jafntefli við nýliða Nürnberg á útivelli.

Dortmund tapaði fyrir Schalke í gær og gat Bayern því stigið stórt skref í átt að titlinum með sigri í dag. Það gerðist þó ekki og því er enn mikil spenna.

Staðan var markalaus eftir fyrri hálfleik í dag en Matheus Pereira kom heimamönnum í Nürnberg yfir á 48. mínútu en stundarfjórðungi fyrir leikslok jafnaði Serge Gnabry metin. Lokatölur 1-1.

Bayern er enn á toppnum. Þeir eru með 71 stig en Dortmund er í öðru sætinu með 69 stig. Þrjár umferðir eru eftir af deildinni.