Lögreglan telur morðingja fela sig „í allra augsýn“

Lögreglan í þrjú þúsund manna smábænum Delphi í Indiana-fylki í Bandaríkjunum telur að morðingi tveggja táningsstúlkna sem myrtar voru í bænum fyrir tveimur árum „feli sig fyrir allra augum.“

Samkvæmt frétt ABC telur lögreglan að morðinginn, sem lögreglan slær því föstu að sé karlkyns, búi í Delphi, vinni þar, eða heimsæki bæinn í það minnsta reglulega.

Morðinginn er talinn vera á aldursbilinu 18 til 40 ára. Hann kunni þó að virðast yngri en hann er, samkvæmt lögregluforingja Delphi, Douglas Carter.

Á blaðamannafundi vegna málsins talaði Carter beint til morðingjans.

„Við höldum að þú felir þig í allra augsýn Kannski í þessu herbergi. Við höfum mjög líklega tekið skýrslu af þér eða einhverjum nákomnum þér.“

Stúlkurnar tvær sem myrtar voru í febrúar 2017 hétu Abby Williams og Libby German. Þær voru 13 og 14 ára gamlar. Þann 13. febrúar áttu þær frí frá skóla, en síðast var vitað um ferðir þeirra á gönguleið skammt utan Delphi.

Daginn eftir fundust lík þeirra beggja skömmu frá gönguleiðinni. Lögreglan hefur ekki gert opinbert nákvæmlega með hvaða hætti stúlkurnar voru myrtar.