Emil lék sinn fyrsta leik í sjö mánuði

Emil Hallfreðsson lék sinn fyrsta leik í sjö mánuði þegar Udinese gerði markalaust jafntefli við Inter á heimavelli í ítölsku úrvalsdeildinni í kvöld.

Emil lék síðast með Frosinone í 3-2 tapi fyrir Torino 5. október í fyrra. Hann hefur verið frá keppni vegna hnémeiðsla síðan þá.

Hafnfirðingurinn gekk í raðir Udinese í lok febrúar og kom í fyrsta sinn við sögu hjá liðinu í kvöld. Emil kom inn á sem varamaður þegar 17 mínútur voru til leiksloka. Hann lék áður með Udinese á árunum 2016-18.

Udinese er í 17. sæti deildarinnar, fimm stigum frá fallsæti.

Inter er aftur á móti í 3. sætinu með 63 stig. Liðið hefur gert þrjú jafntefli í röð.