Ríkisstjórnin samþykkti fjölmiðlafrumvarp menntamálaráðherra

Fjölmiðlafrumvarp Lilju Alfreðsdóttur, menntamálaráðherra, var samþykkt í ríkisstjórn í dag. Ráðherrann segir að með frumvarpinu verði stuðningur við einkarekna fjölmiðla hér á landi hliðstæður við þann sem þekkist á Norðurlöndunum.

Stjórnarflokkarnir eiga enn eftir að afgreiða frumvarpið sem hefur verið í vinnslu undanfarna mánuði. Rætt hefur verið um að ríkið gæti styrkt einkarekna fjölmiðla um allt að 25% af tilteknum ritstjórnarkostnaði þeirra, uppfylli þeir ákveðin skilyrði, með frumvarpinu.

Lilja gaf ekki kost á viðtali þegar eftir því var leitað í dag. Í skriflegri yfirlýsingu sem hún sendi Vísi sagði hún viðamikla vinnu að baki frumvarpinu og að það marki tímamót fyrir margra hluta sakir. Ríkisstyrkir til fjölmiðla verði sambærilegir fyrir nágrannalöndin.