Segir Trump-liða hafa reynt að koma í veg fyrir samstarf með Mueller

Michael Flynn, fyrrverandi þjóðaröryggisráðgjafi Donald Trump, sagði rannsakendum Rússarannsóknarinnar svokölluðu að aðilar sem tengist ríkisstjórn Trump og þingi Bandaríkjanna hafi reynt að hafa áhrif á samstarf hans við rannsakendur. Þá veitti hann rannsakendum upptöku af einum slíkum samskiptum.

Alríkisdómari hefur úrskurðað að hluti rannsóknargagna Rússarannsóknarinnar sem snúi að Flynn verði gerði opinber á næstu tveimur vikum.

Meðal þeirra gagna er samtal Flynn við Sergey Kislyak, fyrrverandi sendiherra Rússlands í Bandaríkjunum frá því í nóvember 2016. Samkvæmt Washington Post snýr samtalið að viðskiptaþvingunum sem Barack Obama, þáverandi forseti, hafði beitt gegn Rússlandi.

Flynn sagði Kislyak að hafa ekki áhyggjur og bíða eftir því að Trump tæki við embættinu. Leyniþjónustur Bandaríkjanna tóku samtalið upp og vakti það upp áhyggjur af samskiptum starfsmanna framboðs Trump við yfirvöld í Rússlandi í aðdraganda embættistöku Trump.

Bíður dómsuppkvaðningar

Flynn hefur játað að hafa logið að rannsakendum varðandi samskipti hans og Kislyak og bíður dómsuppkvaðningar. Hann hóf samstarf með rannsakendur eftir að til að reyna að fá vægari dóm. Saksóknarar hafa mælt til þess að Flynn fái litinn sem engan dóm vegna þess samstarfs.

Dómarinn úrskurðaði einnig í gærkvöldi að opinbera ætti hljóðskilaboð sem Flynn barst frá lögmanni Donald Trump í nóvember 2017, þegar Flynn var að íhuga að starfa með rannsakendum Rússarannsóknarinnar svokölluðu.

Í því símtali skyldi John Dowd, einkalögmaður Trump, skilaboð eftir í talhólfi Flynn þar sem hann sagðist vilja vita hvort Flynn sæti á einhverjum upplýsingum sem kæmu Trump illa og minnti hann Flynn á að Trump þætti vænt um hann.

Rannsakendur Robert Mueller íhuguðu vandlega hvort símtalið væri til marks um það hvort Trump hefði reynt að hindra framgang réttvísinnar með því að hafa áhrif á Rússarannsóknina.

Margsinnis reynt að hafa áhrif á hann

Í nýlega opinberuðum dómsskjölum kemur einnig fram að Flynn sagði hann og lögmenn hans hafa margsinnis verið í samskiptum við aðila sem tengist ríkisstjórn Trump og þingi Bandaríkjanna sem snúið hafi að mögulegu samstarfi hans með rannsakendum. Með því markmiði að fá hann til að starfa ekki með rannsakendum.

Þá kom fram í skýrslu Mueller að Reince Priebus, fyrrverandi starfsmannastjóri Hvíta hússins, og K.T. McFarland, fyrrverandi aðstoðarþjóðaröryggisráðgjafi, hafi verið beðnir, af Donald Trump, að ræða við Flynn og segja honum að sýna skapstyrk.

Í skýrslu Mueller segir að hann hafi ekki viljað segja til um hvort að Trump hafi hindrað framgang réttvísinnar eða hvort ákæra ætti forsetann, vegna reglna Dómsmálaráðuneytis Bandaríkjanna um að ekki sé hægt að ákæra sitjandi forseta. Þessi í stað tíundaði Mueller tíu liði rannsóknar sinnar sem sneru að þeim möguleika. Þá sagði hann að ákvörðunin ætti að vera þingsins.

William Barr, dómsmálaráðherra Trump, lýsti því þó sjálfur yfir að ekki væri tilefni til að ákæra Trump. Sannanir Mueller dygðu ekki til ákæru eða sakfellingar fyrir dómi. Barr hefur verið harðlega gagnrýndu fyrir atferli sitt í tengslum við skýrslu Mueller.



Sjá einnig: Saka dómsmálaráðherra Bandaríkjanna um vanvirðingu gagnvart þinginu

Rúmlega 900 fyrrverandi alríkissaksóknarar hafa þó skrifað undir yfirlýsingu þar sem þeir segja að ef Trump væri ekki forseti væri hægt að ákæra hann.

„Hver okkar trúir því að framferði Trump forseta eins og því er lýst í skýrslu Mueller myndi, í tilfelli annarra persóna sem væru ekki varðar af reglum Dómsmálaráðuneytisins gegn því að ákæra sitjandi forseta, leiða til margra ákæra fyrir að hindra framgang réttvísinnar,“ skrifa saksóknararnir.



Sjá einnig: Alríkissaksóknarar segja hægt að ákæra Trump ef hann væri ekki forseti

Demókratar í fulltrúadeild þingsins leggja mikið kapp á það þessa dagana að koma höndum yfir skýrslu Mueller í heilu lagi og öll gögn rannsóknarinnar. Það eina sem þeir hafa séð hingað til er útgáfa skýrslunnar þar sem Barr hefur strikað yfir stóran hluta hennar.

Heimildarmaður Politico innan þingsins segir þá staðreynd að aðili eða aðilar sem tengist þinginu hafi reynt að koma í veg fyrir að Flynn ræddi við rannsakendur til marks um nauðsyn þess að Demókratar sjái skýrsluna í heild sinni.