Íslensk tunga í hávegum

„Við munum hafa íslenska tungu í hávegum í þessari ferð sem ég veit að verður einstök upplifun,“ segir Rósa Jóhannesdóttir, stjórnandi ungmennakórsins Graduale Futuri, um vesturför kórsins sem lagt verður í þann 13. júní.

Graduale Futuri er einn af Langholtskirkjukórunum. Rósa er búin að vera með hann í tólf ár og segir hann búinn að vera eitt ár að undirbúa þessa ferð. „Við fljúgum til Minneapolis og ætlum að feta í fótspor Stikkilsberja-Finns við upptök Mississippifljótsins og heimsækja íslensku nýlenduna í Norður-Dakóta þar sem skáldin Stephan G. Stephansson og Káinn (Kristján Níels Jónsson) bjuggu. Stephan G. nefndi sína sveit eftir Garðari Svavarssyni og héraðið ber enn nafnið Gardar,“ lýsir Rósa.

„Svo heimsækjum við Nýja Ísland, þar sem fyrstu landnemarnir stigu á land í október árið 1875. Aðalerindið er samt að syngja á þjóðhátíðardaginn í Winnipeg, við styttu Jóns Sigurðssonar sem er eftirgerð styttunnar á Austurvelli. Þar verður deginum fagnað og með okkur syngur vesturíslenskur Sólskríkjukór.  Svo storma allir samkomugestir í listasal fylkisins á tónleika hjá okkur. Þeir eru vel auglýstir vestra og mikið við haft. Þarna er fólk sem vill viðhalda sinni íslensku menningu og tungu og keyrir mörg hundruð kílómetra til að upplifa slíka stemningu, ekki síst þegar gestir koma frá Íslandi.“

Rósa kveðst sjálf hafa farið með danshópi á slóðir Vestur-Íslendinga 2006 og þá komist  á bragðið. „Andrúmsloftið er svo einstakt og mig langaði að kynna þennan heim fyrir börnum, enda er hann hluti af okkar menningarsögu. Það hentaði vel að fara núna, svona í skólalok þegar allir eru í söngformi.“ 

Í kórnum eru stúlkur á aldrinum 10-15 ára að sögn Rósu. „Svo fer einn bróðir með sem er sextán ára og er í söngnámi, hann syngur eitthvað með okkur.“ Þetta er níu daga ferð. Við förum að Gimli, heimsækjum  grunnskólann þar, svo syngjum við á nokkrum fyrirfram ákveðnum stöðum og eflaust úti um hvippinn og hvappinn!“

Til að hita upp fyrir ferðina ætlar Graduale Futuri að halda fjölbreytta tónleika í Langholtskirkju í kvöld sem hefjast klukkan 20. Auk væntanlegra ferðalanga verður Magnús Ragnarsson organisti á sínum stað.

Miðaverð á tónleikana er 1.000 krónur og upphæðin rennur beint í ferðasjóð kórfélaga. Frítt inn fyrir börn yngri en 16 ára.