„Þegar menn voru byrjaðir að undirrita þá gerðist eitthvað“

Sigmundur Davíð Gunnlaugsson, formaður Miðflokksins, segist ekki vera alveg með það á hreinu hvers vegna samkomulag um þinglok náðist ekki á milli flokksins og ríkisstjórnarflokkanna í gær.

Hann segir í samtali við Vísi að samkomulag hafi legið fyrir og menn voru byrjaðir að skrifa undir það þegar eitthvað mun hafa komið upp innan Sjálfstæðisflokksins, eins og Sigmundur orðar það. Hann segist eftir að fá nánari skýringar á því hvað það hafi verið.

Spurður út í það að orðalagið samkomulaginu væri opið og vantraust ríki í garð Miðflokksins segist hann halda að málið hafi snúist um orðalag varðandi yfirferð á þriðja orkupakkanum á síðsumarþingi og með hvaða hætti það yrði gert.

Sjá einnig: Vantraust í garð Miðflokksins ástæða þess að Sjálfstæðismenn höfnuðu samkomulaginu

Í samkomulaginu var kveðið á um að fimm manna sérfræðinganefnd myndi koma að málinu. Miðflokkurinn gerði kröfu um nefndina og segir Sigmundur að hana hafi átt að skipa í samráði við alla flokka.

En þetta lagðist ekki vel í aðra hérna?

„Einhverjir þingmenn Sjálfstæðisflokksins eða einhver þingmaður Sjálfstæðisflokksins virðist hafa gert athugasemdir við það,“ segir Sigmundur.

Aðspurður hvort það komi til greina af hálfu Miðflokksins að hverfa frá kröfunni um sérfræðinganefndina segir Sigmundur:

„Ég á enn eftir að fá á hreint hver afstaða Sjálfstæðisflokksins í raun er því þetta kom öllum á óvart. Þegar menn voru byrjaðir að undirrita þá gerðist eitthvað. Þannig að ég ætla að byrja á að reyna að átta mig betur á því.“

Ekki meiningin að hnýta í forsætisráðherra

Það vakti töluverða athygli í gær þegar fregnir bárust af því í gærkvöldi að Miðflokkurinn hefði krafist þess að frumvarp um kynrænt sjálfræði yrði tekið af dagskrá.

Spurður hvers vegna sú krafa hefði verið sett fram segir Sigmundur að það hafi ekki snúið að því að taka málið af dagskrá heldur því að ekki væri verið að bæta inn nýjum málum eftir að viðræður hófust.

„Þetta er auðvitað rosa stórt mál með stórar spurningar sem að hinir ýmsu aðilar hafa vakið athygli á að þurfi að skoða betur þannig að okkur þótti svolítið skrýtið að ætla að skella þessu máli inn svona á lokasprettinum og klára það á einum eða tveimur dögum,“ segir Sigmundur.

En er þetta ekki eitthvað mál sem hefur alltaf legið fyrir?

„Það eru auðvitað mörg mál sem ríkisstjórnin hefði óskað sér að klára og voru ekki komin inn þegar menn fóru að ræða þinglokin þannig að þetta snerist nú kannski fyrst og fremst um það. En gott og vel, þau voru greinilega mjög spennt að fá þetta mál í gegn, allavega einhverjir, þótt mér skiljist að í Sjálfstæðisflokknum séu kannski ekki allir sáttir við þetta. En þá fara þau bara yfir það og bera ábyrgð á því.“

Aðspurður hvort Miðflokkurinn sé á móti frumvarpinu segir Sigmundur að heilbrigðisstéttir hafi bent á það að ýmislegt í frumvarpinu þurfi að laga og vonandi gefist tími til þess. Þá segir hann alls ekki verið að hnýta í Katrínu Jakobsdóttur, forsætisráðherra, með þessu en hún leggur frumvarpið fram.

„Við höfum enga ástæðu til að hnýta neitt sérstaklega í hana og samskipti okkar um þinglokin gengið alveg þokkalega og ég taldi mig vera búinn að semja við hana á sínum tíma og svo aftur núna í gær en við sjáum hvort við náum að klára þetta í þriðju tilraun.“

Fréttin hefur verið uppfærð.