Niðurstöður í kröfur vegna Gaman Ferða væntanlegar með haustinu

Enn eru nokkrar vikur þar til að búast má við niðurstöðum í innsendar kröfur vegna rekstrarstöðvunar ferðaskrifstofunnar Gaman Ferða. Rekstarfélag Gaman Ferða, Gaman ehf, skilaði inn ferðaskrifstofuleyfi sínu 11. apríl síðastliðinn, skömmu eftir fall WOW Air sem átti 49% hlut í félaginu,

Greint er frá þessu á vef Ferðamálastofu en stofnunin hefur unnið, frá rekstrarstöðvun Gaman ehf, við að gera fólki, sem átti bókaðar ferðir með skrifstofunni, kleift að nýta það sem greitt hafði verið fyrir.

Á vef Ferðamálastofu segir að í fjölmörgum tilfellum hafi, fyrir tilstilli Ferðamálastofu, hægt að nýta hluta pakkaferða. Eftir standi þó ferðir eða hluti ferða, í þeim tilfellum eigi fólk rétt á endurgreiðslu úr tryggingafé ferðaskrifstofunnar.

Sjá einnig: Gaman Ferðir hætta starfsemi

1038 kröfur bárust Ferðamálastofu en skoða þarf hvert og eitt mál sérstaklega. Þeir sem sendu inn kröfu mega vænta þess að berast formleg tilkynning um stöðu kröfunnar. Ferðamálastofa segir að reynt verði að hraða ferlinu eins og hægt er en í fyrsta lagi megi búast við niðurstöðum með haustinu.

Gaman Ferðir stóðu undanfarin ár að ýmis konar ferðum, borgarferðum, sólarlandaferðum og ferðum á íþróttaleiki og tónleika.

Þór Bæring Ólafsson hjá Gaman Ferðum, sagði í samtali við Vísi í apríl, að fall WOW Air hafi reynst meira áfall en búist hafði verið við. Útlit hafi verið fyrir að lausafjárstaða félagsins yrði ekki nógu sterkt og því hafi ákvörðunin erfiða verið tekin til að þjónusta best hagsmunum viðskiptavina og starfsfólks Gaman Ferða.