Inter á leið til Englands vegna viðræðna um Lukaku

Forráðamenn Inter Milan eru á leið til Bretlandseyja til þess að ganga frá viðræðum við Manchester United um kaup á Romelu Lukaku.

Lukaku hefur verið ítrekað orðaður við Inter í sumar en nú greinir Sky Sports frá því að Juventus hafi einnig áhuga á að fá belgíska framherjann til sín. Því þarf Inter að hafa hraðann á.

United vill fá 75 milljónir punda fyrir Lukaku og það allt í peningum, Rauðu djöflarnir hafa ekki áhuga á að fá leikmann í staðinn.

Lukaku er samningsbundinn United til 2022 en vill þó fara frá félaginu og forráðamenn United eru sagðir til í að selja fái þeir almennilegt tilboð.

Lukaku er um þessar mundir í Ástralíu með Manchester United þar sem undirbúningstímabilið er hafið hjá flest öllum félögum.