Tap hjá Real í fyrsta leik Hazard

Belgíski sóknartengiliðurinn Eden Hazard lék sinn fyrsta leik fyrir Real Madrid í nótt eftir að hafa gengið í raðir spænska stórveldisins frá Chelsea fyrir tæpar 100 milljónir evra í sumar.

Andstæðingurinn var þýska stórveldið Bayern Munchen og stilltu bæði lið upp sterkum byrjunarliðum og gerðu svo fjölmargar breytingar í leikhléi.

Corentin Tolisso kom Bæjurum yfir eftir fimmtán mínútna leik og var staðan í leikhléi 1-0.

Robert Lewandowski og Serge Gnabry komu Bayern í 3-0 áður en markverði liðsins, Sven Ulreich, var vikið af velli með rautt spjald á 80.mínútu. Madridingar nýttu liðsmuninn til að minnka muninn en það gerði brasilíska ungstirnið Rodrygo á 85.mínútu en Real borgaði 45 milljónir evra fyrir kappann í sumar.