Þrettán uppsagnir hjá Sýn

Þrettán starfsmönnum Sýnar var sagt upp í dag. Uppsagnirnar eru þvert á fyrirtækið. Heiðar Guðjónsson, forstjóri fyrirtækisins, segir uppsagnirnar vera hluta af skipulagsbreytingum vegna sameiningar Vodafone og 365. Nú, tæpum tveimur árum eftir kaup Vodafone á 365, sé sameiningunni lokið.

„Þegar er verið að sameina fyrirtækið þá tekur það tíma. Fyrirtækin eru sameinuð þannig að það eru oft tveir hlutir af því sama og svo kemur sameiningin í framkvæmd. Þá eru deildir sameinaðar og þá sjálfkrafa verður einhver fækkun í starfsliðinu. Þessi sameining er búin að taka of langan tíma en nú er loksins verið að reka endahnútinn á hana,“ segir Heiðar í samtali við fréttastofu.

Þá þvertekur Heiðar fyrir að uppsagnirnar tengist því að Sýn missti enska boltann í hendur Símans í nóvember. Hann bendir á að uppsagnirnar hafi verið þvert á deildir fyrirtækisins og u.þ.b. jafnmörgum sagt upp í hverri deild.

„Þannig að þetta hefur ekkert með enska boltann að gera. Ef það hefði verið ástæðan hefði verið gripið inn í það mun fyrr, enda vissum við í nóvember að við yrðum ekki með enska boltann á næsta ári.“

Meðal þeirra sem sagt var upp störfum var Hjörvar Hafliðason sem stýrt hefur útvarpsþættinum Brennslunni á FM957 meðfram störfum sínum sem sparkspekingur á Stöð 2 Sport.

Vísir er í eigu Sýnar hf.