Arnór með mark og stoðsendingu í sigri

Arnór Smárason skoraði eitt mark og lagði upp annað í 3-2 sigri Lillestrøm á Mjøndalen í norsku úrvalsdeildinni í kvöld.

Olivier Occean kom Mjøndalen yfir á 10. mínútu. Þremur mínútum síðar fékk Lillestrøm vítaspyrnu. Arnór fór á punktinn og skoraði af öryggi. Þetta var þriðja mark Skagamannsins í deildinni á tímabilinu.

13 min: 1-1 Smárason. Setter straffesparket i mål. #LSKLIVEpic.twitter.com/K2BuMpc8eQ

— Lillestrøm SK (@LillestromSK) August 12, 2019

Á 36. mínútu tók Arnór hornspyrnu og sendi boltann á Simen Mikalsen sem skallaði hann í netið og kom Lillestrøm yfir.

Heimamenn komust í 3-1 með sjálfsmarki í upphafi seinni hálfleiks. Occean skoraði sitt annað mark á 70. mínútu en nær komst Mjøndalen ekki. Lokatölur 3-2, Lillestrøm í vil.

Arnór og félagar eru í 9. sæti deildarinnar með 21 stig. Dagur Dan Þórhallsson lék ekki með Mjøndalen sem er í 12. sæti.

Í eina leik kvöldsins í dönsku úrvalsdeildarinnar gerðu SønderjyskE og AGF markalaust jafntefli.

Eggert Gunnþór Jónsson lék allan tímann í vörn SønderjyskE en Frederik Schram sat á bekknum. SønderjyskE er í 5. sæti deildarinnar með átta stig.

Jón Dagur Þorsteinsson lék fyrstu 68 mínúturnar í liði AGF sem er í 12. sæti. Árósaliðið hefur ekki enn unnið leik á tímabilinu.